مصر ام الدنيا
فعلاً مصر ام الدنيا ما جتش من فراغ فمصر فيها من خيرات ربنا كل شىء من أول الإيدز لغاية الضغط والسكر .
مروراً بالألتهابات الفيروسيه الكبديه والفشل الكلوى وانفلوانزا الطيور ، حتى الحصبة الالمانى ، وفوق ده كلة الفقر والبطالة و الموت والتعذيب و تلفيق القواضى ، والفساد والمراقبه للناس حتى فى المراحيض (ودة طبعاً بعد التعديلات الدستورية الجديدة ) ، وضيف على ده كلة انهيار البورصة ، وهبوط السينما وأنحطاط الاغانى المحققه للإيرادات ( بأستثناء سعد الصغير ) علشان انا بحبة ، وحط عليهم شويه كذب وتزوير من النظام وانتخابات وهمية ، وكمان تضيف نقابات مابتدافعش غير عن الحكومة وملهاش دعوة بمصالح أعضائها ، ويا سلام على ارتفاع معدل الجريمة ، والتحرش بالستات والبنات ، وكمان الرجالة ( فى بعض سينيمات الدرجة الثالثة ) وتعرف اخبار بلدنا من برة والاعلام مركز على بسلامتة وابنة والديمقراطية الى احنا فيها ، وفوق ده كلة ارتفاع نسبة التسرب من المدارس وفساد المدارس والمدرسين ، وانخفاض الاجور وانخفاض فرص العمل ، وقلة الاعمال الابداعية ।
لازم تعرف انك على طول فى مصر ، فمصطلح مصر ام الدنيا مجاش من فراغ ، ومصطلح عمار يا مصر برده ما جاش من فراغ
وعايز انهى البوست ب
المصريين اهما
حيوية وعزم وهمه
جيل بعد جيل متقدمين
المصريين المصريين المصريين
